PM Modi-a'n a MP-te thusawi bawlhhlawh a thenfai a ngai: Shiv Sena

BJP thawhpui, Shiv Sena chuan Prime Minister Narenda Modi chu a kaihhruai sorkara MP-ten sawisel hlawh tak thu an sawi ṭhin chung­changah beiin, PM chuan India ram faina beihpui thlaka campaign a neihnaah, a MP-te thusawi bawlhhlawh tak tak thenfai hna a thawh a ngai a ni, a ti.

Tun hnaiah BJP MP Dilip Gandhi chuan vaihlo hi cancer thlentu a ni lo tih a sawi. Gandhi hi Parliamentary panel on subordinate legislation hotu a ni a, he panel hian Cigarettes and Other Tobacco Products Act provision-te a zirchiang ṭhin a ni. Gandhi hian vaihloin cancer natna a thlen loh bakah, vaihlo hmang ṭhinte chu kum 100 chuangte an dam thei a ni, tiin a sawi.

Gandhi chuan India rama zirchianna neihah vaihlo hman leh cancer inzawmna hmuhna engmah a awm lo a ni, tiin a sawi. Hei vang hian sorkar laipuiin vaihlo leh vaihlo aṭanga thil siam hlauhawm­zia a lem hmanga a tihchhuah ṭhin pawh titlem turin a ngen bawk.

BJP MP Gandhi chu a thusawi vanga ti elin, Shiv Sena chuan, "Dilip Gandhi hi a thusawi avang hian Nobel prize pek hial tlak a ni," a ti.