Black Money Luhka tihtawp a ni : PM Modi

Prime minister Narendra Modi chuan nimin khan farm law dodaltute chu chhang letin he dan hi black money luhka tihtawpna a nih thu a sawi.

Uttarakhand-a video-confe­rencing kaltlanga development project a hawnnaah Prime Minister Modi chuan farm law dodaltute chu na taka sawiselin a dodaltute chuan loneitute an hmusit a ni, a ti. 

"Parliament session zawh takah khan loneitu, labour leh health lamah insiam ṭhatna ṭhenkhat siam a ni. Hengte hian labour, ṭhalai, hmeichhia leh loneitute a tichak dawn. Mahse mi ṭhenkhatin an dodal tih kan hmu a, chung mite chuan loneitute'n an hman ṭangkai tak khawlte halin loneitute an hmusit a ni," tiin a sawi.

Prime Minister Modi chuan farm law dodaltute chu loneitute a ni lo zawnga hruaiah a puh a, dan thar hnuaiah chuan  MSP chauh a awm dawn lo tih sawiin loneitute chuan khawiah pawh an thlai tharte chu an hralh thei tawh dawn a, mahse chu zalenna chu mi ṭhenkhat chuan an ngai thei lo. A chhan chu black money an lak luhna kawng khat tihtawpa a awm dawn vang a ni, a ti.

Parliament session zawh chiaha farm bill pawm tak, Pathiannia President Ram Nath Kovind-in a pawmpui hnua dana chang ta duh lohna hi ramchhung hmun hrang hrangah lantir niin Thawhṭanni zingah khan India Gate bulah tractor hal a ni bawk a, he thil thlengah hian Punjab Youth Congress chu hnarkaitu ber an ni.

Punjab Youth Congress presi­dent Brinder Dhillon chuan, "Thawm kan chhuah a ngai a, thawm dik tak kan chhuah a ngai a ni. Sorkarah kan awm lo a, chumi vang chuan kawngdungah chiah thawm kan chhuah thei a ni," tiin a sawi a, chu chu sorkar beng ngawng hriat khawpa thawm an chhuah theih dan awmchhun a nih thu a sawi bawk. Hemi kaihhnawihah hian mi panga chu man an ni nghe nghe.

Farm law dodal chungchangah hian BJP chuan Congress chu hnarkaitu berah puhin loneitute rilru hruai dik loah an puh a, mi hriat hlawh an duh vanga buaina chawk chhuakah an puh bawk.