PM Modi-an MUDRA Bank a hawng
Prime Minister Narendra Modi chuan nimin khan New Delhi-ah Pradhan Mantri Jan Dhan Yojana hnuaia awm MUDRA Bank a hawng. He bank kaltlang hian sumdawng tenau te'n cheng nuai 10 thleng an lak theih bakah 'Micro-Finance Institutions' (MFI) regulator atan hman zui a ni bawk ang.
PM chuan, "Industry liante chuan mi vaibelhhe 1.25 vel tan hna an siamsak a, hetihlai hian sumdawng tenau zawkte hian mi vaibelchhe 12 vel hnathawk turin an chhawr a ni. MUDRA Bank hian fund hmu lo, sumdawng tenau zawkte puih chu a tum ber a ni dawn a, sum kan khawl dante hi kan tihchak a ngai a ni," a ti.
Modi chuan chuan tun hnaia ruahsur nasa leh rial tlain an tlai chin a tihchhiatsak, loneitute hnena zângnadawmna pek tur chu 50% a tihpun a ni dawn tih a sawi. Hei bakah hian sorkar ṭanpuina an dawn theihna tur kalphung pawh awlsam zawka siam a nih tur thu pawh a sawi. Thla khat kalta chhung khan ruahsur nasa leh rial tla vangin state 14-ah hectare nuai 120 chuanga thlai chinte a chhiat phah a ni.
PM chuan, "Ruahtui tlak dan dik lo leh khawkheng vangin loneitute'n harsatna hrang hrang an paltlang ṭhin a, hei vang hian bank leh insurance company-te pawh an theih anga loneitute ṭanpuina kalpui turin kan hrilh a ni," a ti.
Parliament-a budget a pharh dawna thu a sawiah khan, Union Finance Minister Arun Jaitley chuan cheng vaibelchhe 20,000 hmanga Micro Units Development Refinance Agency (MUDRA) bank din rawtna hi a siam thu hi a lo tarlang tawh a ni. Fund pekchhuah chungchangah pawh bithliah siamin, 'Shishu', 'Kishor' leh 'Tarun' tia thliar a ni a, Shishu hian loan cheng Rs 50,000 chin huamin, Kishor hian Rs 50,000 leh cheng nuai 5 inkar, Tarun category hian cheng nuai 5-10 chin a huam ang.