Yemen indona bial aṭangin mi 4000 hruai chhuak tawh
Yemen ramchhunga tualchhung indo thlen mekna hmun aṭangin India mi 4000 chu hruai chhuah a ni tawh.
Yemen rama India mite hruaichhuah hna hi sorkar laipui chuan 'Operaton Rahhat' tih hmingin a nei mek a ni. Nimin zing khan Navy lawng, INS Tarkah chuan Yemen rama Al Hodeidah aṭangin Djibouti hmunah mi 74 te a hruaichhuak a, INS Sumitra pawhin nimin vek khan India mite hruaichhuak tura a kal tawpna ber atan Al Hodeidah a thleng bawk. Air India pawhin Yemen khawpui, Sanaa aṭangin a hnuhnung ber atan India panin a thlawk chhuak leh dawn a, sorkar laipui chuan India ram haw duhte chu Sanaa pan vek turin a hriattir.
Thawhṭanni khan thlawhtheihna leh lawng hmangin India mi 1,000 chuang chu hruaichhuah an lo ni tawh a, a hma ni pawhin mi eng emaw zat hruaichhuah an ni tawh bawk. India hi ramdang 26 pawhin an mite hruaichhuahna kawnga pui turin an sawm a ni.
Indian Navy lawnglian hmanga Yemen rama buai hluarna hmun aṭang, ramdang mite chu ṭum hnih thiar chhuah an ni a, heng mite hi ram hrang hrang pakua amite an ni.
Hetihlai hi Djibouti hmuna India mite hruaichhuah hna thawh mek enpuitu, Minister of State for External Affairs VK Singh chuan Yemen-a India mite chhanchhuah beihpui thlak chu Pakistan embassy a kal ṭum ai khan a phurawm hle tih a sawi a, hemi rual hian Pakistan embassy a kal ṭuma political party-te'n an sawiselna tihchhuah chungchangah TV channel a demna thu a sawilang nghal bawk.