Delhi-ah diesel hmang motor Kum 10 aia upa tlan phal lo

National Green Tribunal (NGT) chuan Delhi khawpui chhungah diesel hmang motor, kum 10 aia upa-te chu nimin aṭang khan an tlan a remti lo.

Khawpui boruak bawlh­hlawh zel venna kawng khat atan, NGT chair­person Justice Swatanter Kumar kaihhruai bench chuan he thupek hi a lo tichhuak tawh a, nimin aṭanga hman ṭan tura tih a ni. Bench chuan Denmark, Brazil, China leh Sri Lanka-te pawhin diesel hmang motor khap an tum mek tih a sawi.

Bench chuan, "Ram dang eng emaw zatin diesel hmang motor khapna siam an tum mek a, ṭhenkhat chuan chhiah sang takin an la thung a ni. Boruak bawlhhlawh zel tihthianghlim a nih theih nan khauh taka hmalak a ngai tawh a, khawpuia chengte'n boruak bawlhhlawh an hip avanga an hriselnain a tawrh hi kan duh lo a ni," a ti.

Tribunal chuan bo­ruak bawlhhlawh zel avangin Delhi khawpui chhunga chengte tan natna hri hrang hrang kai a awl bik dawn a, a bikin a tuar nasa tur chu naupangte an ni, a ti. Delhi khawpui chhung tibawlhhlawhtu nasa ber chu diesel khu hi a ni a, hei hian chuap leh thluak bakah, cancer natna thlengin a thlen thei niin a sawi.