India ramah Mpox hri kai hmuh chhuah a ni

India ramah Mpox (monkeypox) hri kai hmuh a ni a, mahse hei hi khawvelin a buaipui mek leh World Health Organization (WHO) in health emergency a puanna chhan strain nen erawh a in ang lo.

Mpox hri hi ramdang aṭanga India ram rawn zin lut mi pakhatah hmuh chhuah a ni a, hri hi a kai ngei nia hriat a nih avangin dah hran nghal a ni a, damdawiin luhpui a ni tawh bawk.

Union Health Ministry chuan hemi chungchanga thuchhuah a siamah, hri kai hmuh chhuah hian a zin veivahna atanga kai a ni tih a sawi. Laboratory-a enfiahnaah he dam loah hian Mpox natna hri West African clade 2 chu hmuh chhuah a ni , a ti. 'He hri a kai ang hi July 2022 thleng khan India ramah a vei mi 30 report an ni tawh. Mahse WHO in khawvel huapa health emergency a puanna chhan, mpox virus clade 1 nen erawh a in ang lo," tiin Ministry chuan a sawi.

Mpox vei hmuh chhuah hi hmun hranah dah niin uluk taka enkawl mek a ni a, dam lo hian natna chi dang leh harsatna engmah a neih rih loh thu ministry chuan a sawi bawk. A case hi uluk zawka chhui tura ruahman a ni.

Ministry chuan mpox vei hmuh chuah a nih hnuah mipuite himna turin contact tracing pawh a ti nghal a, hri kai hi hmuhchhuah belh an la awm loh thu ministry hian a sawi.

Sorkar laipui chuan mpox veite hmuh chhuah zung zung an nih theihna turin state leh UT sorkarte chu thurawn a pe nghal a, inralring renga awm tur leh minsitry-in hri kai leh a kai nia rinhlelhte dah hranna tur hmun siam leh, a chhui dan kawnga kaihhruaina a siamte chu zawm ṭha turin a chah.

August ni 14, 2024 khan WHO chuan mpox variant thar hmuh chuah a nih hnuah, he hri thar hi inkaichhawn awlsam tak a nih thu sawiin public health emergency a lo puang tawh a ni. .

Mpox virus chu eng nge?

Mpox virus hi smallpox kan tih te nen thuhmun a ni. Kum 1958 khan laboratory monkey ah a hmasa hmuh chhuah a ni a, hemi hnuah hian Central leh West Africa tropical rain forests ah hmuh a ni leh bawk.

He natna hrik hi a kai tawhsate nena inkhawih leh, an hmanrua hman leh ransa mpox hri kai aṭangtein a kai chawn theih. He natna inlar dan chu vun thak, khawsik, lu na, tihrawl na, hnungzang na leh taksa a bawk rawn langchhuak te an ni a, kar hnih aṭanga kar li chhung a daih ṭhin. A case tam zawk chu nasa lo, mahnia dam mai chi a nih laiin, a la na zual erawh chu damdawi hmanga enkawl an ngai a ni.