Kuminah ram dang aiin India-ah ṭhalai intihlum an tam

Kuminah ram dang aiin India ramah ṭhalai intihlum an tam zawk tih expert-te chuan an sawi.

Nimin, September 10, 2024 khan ram dangte rualin India ramah World Suicide Prevention Day hman a ni. India ramah hian kum 15-19 inkar thite thih chhanah mahni intihlum chu a palina niin, National Crime Records Bureau (NCRB) data chuan kum 30 hnuai lam thi zinga 40% chuang zet chu mahni intihlum an ni tih a tarlang bawk.

AIIMS-a Department of Psychiatry-a professor Nand Kumar chuan, "India rama ṭhalai intihlum an tam lutuk hi a pawi takzet a ni. Ṭhalai intihlum hi khawvel huapa awm zat anga chhut aiin India ramah a let dawnin an tam zawk. India-ah hian ṭhalai intihlum hi nitin mi 160 vel zel awm anga chhut an ni," a ti. An intihhlum chhan langsar zingah hian chhungkaw boruak chhia, rilru lam harsatna, ruihhlo khawih vang, ngaihzawngte nena inṭhen vang, ṭhiante nena an inkar boruak ṭha lo leh, mal riaua inhriatna vangte a ni tih a tarlang. Kum 2022 khan India ramah mahni intihlum hi mi nuai 1.71 an awm.