Satyam case: Ramalinga Raju leh midangte thiam loh chantir

Ramchhunga accounting tihchingpenna lian ber, Satyam computer scandal thubuaiah Satyam firm chairman hlui, B Ramalinga Raju leh midang pakuate chu nimin khan Hyderabad-a special court in thiam loh a chantir.

Special court chuan Ramalinga Raju leh a unaupa, managing director hlui Rama Raju-te chu kum sarih lung-in tang tur leh, cheng vaibelchhe 5.5 ve ve chawi turin a ti a, midang pariatte chu cheng nuai 50 ṭheuh chawi tura tih an ni bawk.

Satyam sum tihchingpen chungchang hi kum 2009, January 7 khan hailan a ni, cheng vaibelchhe 8,000 vel an tichingpen nia puh a ni. Hemi kum vek February thlaah an case hi CBI-in lain, April 7, November 24 leh January 7, 2010 khan chargesheet pathum an thehlut a ni.

Chargesheet hmasa pahnih hi Satyam neitu, Raju leh a thawhpui midang pakuate lakah thehluh a ni a, a pathumna hi income tax rule hrang hrang palzut chungchanga thehluh a ni bawk.

CBI chuan Raju leh midangte hi inbumna hmangin invoice leh income te dik lo tam tak siamah puh an ni. Satyam sum tihchingpen vanga shareholder te sum hloh zat hi vaibelchhe 14,000 vel a tling nia sawi a ni a, hetihlai hian defence lam chuan an sum chingpen chung­changah an mi puhte hi mawhphurtu an ni lo a, central agency-in thubuai a thehluhah document a thiltelte chu siamchawp mai niin an sawi thung.

CBI bakah Enforcement Directorate chuan Prevention of Money Laundering Act hnuaiah Raju leh midangte lakah hian thubuai a thehlut bawk.