Shobhaa De chungah Shiv Sena an lungawi lo

Shiv Sena chuan author Shobhaa De chu Maharashtra Legislative Assemby, Marathi ṭawng leh Marathi mite sawichhia­ah puhin, Nilaini khan Assembly inkhawm­ah a laka lungawi lohna motion an pu lut.

Shobhaa De hian a twitter-ah, Maharashtra-a BJP-Shiv Sena sorkarin multiplex-ah Marathi film-te tichhuak ngei ngei tura thutlukna a siam chu a sawisel a ni. Hei hi duh loin, Shiv Sena chuan De hian Marathi a huatzia a lantirna hmanrua tiin an puh a, thupha chawi turin an phut.

Assemby-a motion pu luttu, Sena MLA Pratap Sarnaik chuan, "Shobhaa De hian sorkar thutlukna a sawisel a, kan Chief Minister Devendra Fadnavis pawh a sawichhia a ni," a ti. Sarnaik chuan De hian a twitter-ah Marathi chaw sawi­chhiatna pawh a ziak niin a puh.

Shiv Sena puhna hi chhang letin, De chuan amah ngei pawh Maharashtra mi niin, Marathi film pawh a ngaina hle tih a sawi a, thupha chawi tura an phutna chu a hriatthiam loh thu a tarlang.

Hetihlai hian eptu pawl, Congress party chuan State Council-ah CM Fadnavis chu dan loa cheah puhna an thlen ve bawk. CM hian Land Acquisition Act chungchangah sorkar hriattirna a ti­chhuak a, hei hi Congress chuan a sawisel a ni. Congress MLC Manikrao Thakre chuan, "Centre pawhin Land Acquistion Act hi a takin a la kalpui lo a, heti chunga state sorkarin hriattirna a lo tihchhuah hi a dik lo a ni. Sorkar hian hriattirna a tihchhuah tur hi House pawh a hriattir lo bawk," tiin a sawi.