Chittor encounter report thehlut turin AP a hriattir

Sorkar laipui chuan Andhra Pradesh sorkar hnenah Thawhlehnia police-te'n red sandalwood tawlhrutu nia puh mi 20-te, Seshachalam hill range-a an kahhlum chungchangah report thehluh turin a hriattir.

Sorkarin a khap, red sandalwood tawlhru­tu­te kahhlum an nih hian sawizui a hlawh hle. Smug­gler-te hian hrei leh chem an keng a, hetihlai­a ralthuam rip tak nena inthuam, police-te'n man mai loa an kahhlum dan­ah hian zawhna tam tak a awm phah a ni.

Nilaini khan Tamil Nadu-ah chuan police operation hnuaiah mi 20 kahhlum an nih dana lungawi lohna hi lantir a ni a, Tamil Nadu sorkar chuan thi chhungte hnenah zângnadawmna pek a nih tur thu a sawi bawk.

Tamil Nadu-a political party hrang hrangte chuan police-te chetdan an demna thu hi sawiin, an mi kahhlumte chu red sander smuggler tak takte ni loin, nitina thing kit tura an mi chhawrte mai an ni, an ti.

National Human Rights Commission chuan police-te'n red sanders smuggler nia an puhte an kahhlum dan chungchangah Andhra Pradesh chu report pe turin a ngen bawk.

Hetihlai hian police-te chuan thingkit rutute hi an kuta inpe mai turin an ngen a, mahse thingkit rutute hian police leh forest joint team chu an hrei leh chem hmang chuan an bei a, hei vang hian silai an hmehpuah a ngai ta niin an sawi thung.

Andhra Pradesh sorkar hian kum 2013 June thla aṭang khan red sandalwood tawlhru ṭhinte laka veng a, beihpui thlak turin Special Task Force a lo din tawh a ni.