Ram pathum tlawh turin PM Modi a zinchhuak
Prime Minister Narendra Modi chuan kar khat thanga ram pathum tlawh turin nimin khan Delhi a chhuahsan.
PM hian France a tlawh hmasa ber dawn a, Germany leh Canada-te a tlawh bawk ang.
Sorkar laipuiin East Policy a kalpuina hnuaiah ram eng emaw zat chu inzawmna nghet tak a lo siampui tawh a, tunah hian khawthlang ramte chu thawhdunna nghet siampui tumin hma a la leh dawn a ni. PM zin hian a ram tlawh tur pathumte chu thawhdunna nghet leh ṭha zawk siampui a tum bakah, India-in hmasawnna tur project a kalpui atan mel lung pawimawh tak a ni bawk ang.
Modi hi April 12 thleng France-a chamin, France President Francois Hollande chu defence, nuclear leh space sector bakah, smart city leh railways sector chungchangte a sawipui ang.
April 12 hian Germany a pan ang a, Germany Chancellor Angela Merkel nen ram pahnihte inlaichinna ṭha zawk siam dan turte an sawidun ang. Hei bakah han PM hian Hannover Industrial Trade Fair a hawng dawn a, he hunah hian Indian company 400 bakah company CEO 120 vel an tel theih beisei a ni.
A ram tlawh hnuhnun ber tur, Canada ramah hian Indian origin nuai 12 an awm a, Canada ram politics, education leh economy atan pawh an thawh hlawk hle. PM hian Toronto leh Vancouver-ah India mite nen hun an hmang ho leh ang. Modi hi April 18 ah a lo let leh ang.