Greenpeace India-in foreign fund a dawn khapsak a ni

Ministry of Home Affairs chuan NGO, Greenpeace India pawl chu Foreign Contribution Regulation Act (FCRA) hnuaiah rampawn lam aṭanga sum a dawn a khapsak bakah, an pawl bank account pasarih chu khawih chet theih lohin a hrensak nghal.

MHA chuan Greenpeace India hi ramchhung hmun hrang hrangah hmasawnna dal zawnga chetnaa inhnamhnawiha puh a nih avangin an pawl registration pawh a titawp lailawk bawk. NGO hnenah hian hriattirna pein, a registration tihtawp a nih loh tur chhan sawifiah turin a hrilh a ni.

Security agency hrang hrangte chuan MHA hnena report an thehluhah, Greenpeace India hi ram economic security tiderthawng theia an ngaih thu an thlen a, hei vang hian FCRA registration pawh titawp sak turin an rawt a ni.

NGO hian IDBI Bank, ICICI Bank leh Yes Bank-ahte account a nei. Hrek a nihna thupek hi nimin khan Chief Functionary, Greenpeace India Society, Chennai hnenah pek a ni.