Supreme Court hun tiam ral hnuah Kokata doctor-ten nawrh la chhunzawm

Supreme Court-in Kolkata-a RG Kar Hospital-a doctor zirlai pawngsual leh thah a nih avanga lungawi lohna lantirtu, West Bengal junior doctor-te chu Thawhlehni, September 10 tlai dar 5 ral hmaa an hna zawm vek tura a hriattirna chu doctor-te chuan zawm loin, an thil phut tihhlawhtlin a nih hma chu nawrh an chhunzawm tur thu an sawi.

Damdawi lama thawktute hian nimin thleng khan ni 33 nawrh an huaihawtna a ni tawh. Junior doctor chunga rawng taka chetna thleng kaihhnawihah hian Kolkata Police Commissioner leh Health Department-a official eng emaw zatte ban turin an phut a ni.

Chief minister Mamata Banerjee chuan lungawilohna lantir te hnenah hian lehkha thawnin, secretariat-a meeting neihpui turin a sawm tih state sorkar chuan a sawi. Mahse doctor-te hian meeting pui tura sawmna an dawn hi bang tura an ngiat mek, state health secretary hnen aṭangin a nih thu an sawi, hei hi "in runluihna" zawk nih thu leh, meeting-a tel tura an aiawh mi 10 chauh tel an remti chu "in zah lohna" a ni, an ti.

Junior doctor-te hian zirlai pawngsual leh thah tawktu ruang, hospital seminar room-a chhar a nih aṭanga darkar reilo te hnu, August 9 aṭang khan nawrh hi huaihawt ṭanin, an nawrh vangin West Bengal-a states sorkar enkawl damdawiin hrang hrangah harsatna tawkin an buai phah hle a ni.

State sorkar chuan Supreme Court hnenah, doctor-te nawrh vang hian dam lo enkawl lai 23 in nunna an chan phah tawh bawkah, healthcare service a nghawng buai nasa hle tih a lo sawi tawh bawk.