Israel-in India-ah an rama hna thawk tur 10,000 la dawn

Israel chuan Hamas nena an indo mek avangin in sakna lama thawktu leh mi enkawltu tur,construction worker leh caregiver a indaih lo hle. Hei vang hian India ramah heng hna thawktu tur mi 10,000 lak sak turin a ngen. Kumin kumtir lam khan hnathawktu lak sak tur hian India sorkar chu a lo ngen tawh bawk a ni.

Population, Immigration, and Border Authority (PIBA) Israel chuan construction worker an mamawh angte pawh sawilang nghalin; framework, iron bending, plastering leh ceramic tiling hna thawk tur an mamawh tih a sawi. PIBA team hian hna thawk tur la tur hian India pawh an rawn tlawh thuai dawn a, construction worker lak runpui hi Maharashtra state-ah neih a ni ang.

Israel chuan an healthcare service thuam chakna turin caregiver 5,000 a mamawh belh bawk. He hna dil thei hi Class 10 pass chin niin, a diltu hian darkar 990 tal training a neih a ngai bawk.

National Skill Development Corporation (NSDC) chuan state hrang hrang hnenah hriattirna pein, November 2023-a Israel leh India-in government-to-government (G2G) agreement an lo ziah tawh zulzuia thawktu lak tur hi kalpui turin a ti. G2G hnuaia inremna an siamah chuan, hnathawk tura thlan chhuahte chu India an chhuahsan hma in orientation training neihpui vek an ni ang a, hetah hian Israel mite nunphung leh ziarangte pawh an zir tel nghal dawn a ni.