Union Cabinet-in kum 70 leh a chunglam hman tur healthcare pawm

Prime minister Narendra Modi kaihhruaina hnuaia Nilaini, September 11-a union cabinet ṭhukhawm chuan flagship scheme, Ayushman Bharat Pradhan Mantri Jan Arogya Yojana (AB PM-JAY) hnuaiah kum 70 leh a chunglam zawng zawng, an sum lak luh zat engmah thliar loa an dam lo inenkawlna tur, health coverage a pawm.

Cabinet thutlukna siam hi India rama chhungkua vaibelchhe 4.6, kum 70 leh a chunglam mi vbc ruk ten an chhawr thei dawn a, kum khatah chhungkaw khat tan inenkawlna tur hi Rs nuai 5 thleng a huam thei dawn a ni.

He scheme an pawm thar hi BJP ten menifesto-a an lo tiam tawh zinga mi niin, an pawm tak avangin eng dinhmun pawh ni se, kum 70 leh a chunglam tawh phawt chuan AB PM-JAY aṭanga hamṭhatna hi an dawng thei vek tawh ang.

Kum 70 leh a chunglam, AB PM-JAY hnuaia lo inziak lut tawh chuan anmahni pual bikin dam lo enkawlna hi kum khatah Rs nuai 5 an neih belh thei dawn a, hei hi an chhungkaw member kum 70 hnuai lamte chuan an ṭawmpui thei lo ang. Public health scheme dang - Central Government Health Scheme (CGHS), Ex-Servicemen Contributory Health Scheme (ECHS), Ayushman Central Armed Police Force (CAPF) lo hmangte chuan a scheme hman mek emaw, AB PM-JAY emaw an duh zawk an thlang thei ang. Private health insurance policy leh Employees’ State Insurance scheme hnuaia awm, kum 70 leh a chunglamte pawhin AB PM-JAY scheme hi an hmang thei ve dawn bawk a ni.

" AB PM-JAY hi khawvela sorkar hnuaia health assurance scheme lian ber a ni a, he scheme hmang hian chhungkaw khat tan kum khatah natna khirhkhan leh pangngai enkawlna turin Rs nuai 5 bill theih a ni a, chhungkaw vaibelchhe 12.34-a mimal vaibelchhe 55 a huam a ni, " tiin sorkar laipui chuan a sawi.