CPI(M) hruaitu Sitaram Yechury a thi

Communist Party of India (Marxist) general secretary, Sitaram Yechury chu nimin, September 12, 2024 chawhnu dar 3.05 khan kum 72 mi niin New Delhi-a All India Institute of Medical Sciences (AIIMS) ah a thi. Yechury hian a nupui Seema Chishti, fapa pakhat leh fanu pakhat a kalsan a ni.

Yechury hi August 19-ah khan pneumonia vangin AIIMS ah dah luh a ni a, intensive care unit-ah dah nghal a ni. Respiratory tract infection nasa tak a lo neih tawh vangin ṭhat lam pan thei loin, nimin khan a boral ta a ni. A chhungte chuan a ruang hi AIIMS-ah hian research neihna atan an hlan. AIIMS-ah hian ni hnih dahin, CPM headquarters, AKG Bhavan-ah a thawhpuite leh amah ngaisangtuten thlahna hun an hman theihna atan dah a ni a, a hnuah AIIMS ah bawk sawn leh a ni ang. Sitaram Yechury hi kum 30 chuang CPM thuneitu sang, Politburo member niin, 2005-2017 chhung Rajysa Sabha MP a ni bawk.