France-ah PM lawmna hun buatsaih a ni

Ram pathum tlawh tura zinchhuak, Prime Minister Narendra Modi chu Ningani zan khan France a thleng a, nimin zing khan PM lawmna hun hman a ni. France-ah hian ni hnih a cham ang.

PM Modi hi France President Francois Hollande chuan lo dawngsawng a, Republican Guard of France-in sipai zahna an hlan a, India leh France hnam hla tihchhuah a ni bawk. Lawmna hun hman zawh hnu hian Modi chuan France CEO-te chu a kawm nghal a, infrastructure leh defence technology lam an sawi ho a ni.

Nimin vek khan Modi leh Hollande-te hi lawngah an inkawm zui bawk a ni. France rama PM a cham chhung hian kum 2012 aṭanga buaipui tawh, India-in France hnen aṭanga Rafale fighter jet a leina tura inremna Medium Multi-Role Combat Aircraft (MMRCA) deal chu an tihfel beisei a ni. India hian dollar tluklehding­awn 20 sengin France Rafale fighter jet 126 lei a tum a, mahse inremna kalphung hi siam dang­lam a ni leh mai thei.

France pana a thlawhchhuah hmaa an kawmnaah, PM chuan, "Rafale lei dan tur chungchang hi sawi ho mek a la ni a, inremna pawh kan siam theih thuai beisei a ni," a ti.

Kum 2012, January 31 khan Indian Air Force (IAF) tan France firm, Dassault hnen aṭangin Rafale jet fighter peihfel sa 126 a lei tum a nih thu puan a ni. Mahse a man chungchang leh thawn luh a nih dan turah kum thum zet chu inremna siamfel lohin a la awm.

India chuan Rafale fighter a lei tur zingah 18 chu peihfel sa thlapa lei a, a bak 108 chu India rama siamchhuah ni se a ti a ni. A siamna kawngah han Dassault firm chu mawphurhna pumhlum la a, Bangalare-a siam turin a duh. Mahse Dassault hian India ram leilunga siam tur hian guarantee a pe thei lo a ni.