Yemen aṭanga India mi thiarchhuah hna zo
Tualchhung indo thlen mekna, Yemen ram aṭanga India mi thiarchhuah hna chu nimin khan zawh a ni a, indona bial chhung aṭang hian mi 5,600 hruaichhuah an ni a, an zingah ram dang mi 960 an tel.
India mite hruaichhuah hna hi External Affairs Minister VK Singh chuan a hmunah a enpui a ni. Ministry thupuangtu, Syed Akbaruddin chuan Yemen khawpui aṭangin special Air India flight pathum hmangin mi 630 chuang chu hruaichhuah an ni leh tih a sawi.
Akbaruddin chuan Houthi helpawl leh Yemen sorkar thlawptute inbeih nasatna, chhim lama Aden khawpuiah chuan bomb a puak chhunzawm reng nia sawiin, Yemen ram dinhmun chu a chhe zel a ni, a ti.
Sorkar laipuiin thlawhtheihna hmanga India mite hruaichhuah hna a neih aṭanga nimin thleng khan Yemen khawpui, Sanaa aṭang hian mi 2,900 thiar chhuah an ni a, thlawhtheihna hi ṭum 18 tirh a ni bawk. Hei bakah hian March 1 aṭang khan lawnglian hmangin Aden aṭangin India mi 1,670 chuang phurchhuah an ni bawk.