Kashmir Pandits chungchangah BJP leh PDP ngaihdan a inang lo

Jammu and Kashmir-a ṭangrual sorkar siamtu, BJP leh PDP chu Kashmir Pandits tana khaw hran siamsak chungchangah an ngaihdan a inang lo.

BJP hruaitu, Union Home Minister Rajnath Singh chuan Kashmir Pandtis tan hian Kashmir valley-ah an awmkhawmna tur khaw hran ruahman a ni tih a sawi a, Union Minister dang Jitendra Singh pawhin sorkar chuan Kashmir Pandits te hi an state-ah ngei him taka hruai kir an nih theihna turin a bei dawn tih a sawi.

Jammu and Kashmir Chief Minister, PDP hruaitu Mufti Mohammad Sayeed chuan Kashmir Pandits te a hranpaa awmna tur siamsak ṭha a tih loh thu sawiin, 'Israel type settlement' ang siam a duh loh tih a sawi. A ngaihdan hi Home Minister Rajnath Singh pawh a hrilh tawh a ni.

Kashmir Pandits-te hi kum 25 liamtaa an chenna, Kashmir Valley-a fir­fiakte chetna inṭan chhoh avanga himna zawnga hmun danga tlanchhiate an ni. Mahse heng mite hi sorkar chuan an ramah hian hruai kir leh tumin hma a la mek a ni. Kum 1990 chho khan Pandits nuai thum velin Valley hi an chhuahsan a, sorkarin hna pek a tiam avangin an zinga eng emaw zat chu kum 2007 khan an kir leh a ni. Mahse heng mite pawh hi tun thlengin pem lut ang­in awm khawm tir an ni a, ration card leh voter ID card pawh pek an ni ve lo.

Sorkar laipuiin Pandits-te awmna pual bik khua siam a tum hi Jammu and Kashmir-a party dangte pawhin an sawisel a, Hurriyat conference chairman Syed Ali Shah Geelani chuan mipuite ram chhuhsak a, Palestinian mite ang maia dah tumna niin a puh. Chief Minister hlui Omar Abdullah pawhin Pandits-te a hrana khung beh tumna a ni tiin, "Hetianga khung bet tur chuan Pandits tam takte hi an kir duh lo ang," a ti. Pandits-te dahhran tum vanga hian state chhung hmun hrang hrangah lungawi lohna lantir a ni bawk.