26/11-a Mumbai beihna ruahmantu a zalen

Kum 2008, November 26-a Pakistan firfiakte'n Mumbai khawpui an beih­naa a ruahmantu ber, Lashkar-e-Toiba commander Zakiur Rehman Lakhvi chu nimin khan jail aṭang chhuah zalen a ni.

Pakistan-a Lahore High Court chuan Lakhvi chhuahna tur thupek hi a tichhuak a, cheng maktaduai khat dahkham turin a hriattir bawk.

Punjab province sor­karin Lakhvi a hrenna chu Ningani khan court hian hnawlin, chhuah turin thupek a siam a ni. Lahore HC-a Justice Muhammad Anwarul Haq chuan Maintenance of Public Order hnuaia kum 55 mi Lakhvi hren a nih danah hian sorkar lam chuan a tih dik lo finfiahna lantir tur a nei lo niin a sawi.

LHC official chuan, "Law officer chuan Lakhvi information pawimawhte thehlut mah se, court chuan hei hi ṭha tawkah a ngai lo a ni," a ti.

Kum 2008, November 26-a Mumbai beihnaah khan mi 166 an thi a, he pawikhawihna thlentu leh ruahmantu-ah Lakhvi leh midang parukte chu thubuai siamsak an ni. Kum 2009 aṭang khan thubuai hi kalpui ni tawh mah se, tun thlengin chinfel a la ni lo.