CBI case-ah Arvind Kejriwal bail-a chhuah phalsak

Supreme Court chuan nimin, September 13, 2024 khan Delhi Chief Minister leh Aam Aadmi Party(AAP) national convenor, Arvind Kejriwal chu Delhi excise policy kaihhnawiha Central Bureau of Investigation (CBI)-in thubuai a siamsakah bail-a chhuah a phalsak. Hemi rual hian bail-a a chhuah chhunga a zawm tur leh tih loh tur te a tuksak nghal bawk.

June thla khan Delhi Rouse Avenue Court chuan Kejriwal hi excise policy kaihhnawiha sum tihchingpen chungchanga Enforcement Directorate (ED) in thubuai a siamsakah bail lo phal sak tawhin, Supreme Court pawh hian ED case-ah vek hian hian June 12 khan interim bail a lo phal sak ve bawk.

Supreme Court chuan excise policy thubuaia bail an phalsak laia Kejriwal zawm tur a tuksakah hian, vantlang hriatah thubuai kaihhnawih thil hi engmah a sawi tur a ni lo a, ngaihhnathiamna pek a nih loh chuan hearing neih apiangin trial court-ah a inlan zel tur a ni, tih a nih thu justice Surya Kant chuan a sawi.

A hmaa ED case-a bail phalsak a nih pawh khan Kejriwal zawm tura an lo sawi tawhte kha tun ṭumah pawh hman leh vek a ni dawn tih Supreme Court chuan a sawi. A zawm tura an lo zam sak tawhte chu -

1. Bail-a chhuah a nih chhung hian Bail bond atan sumfai Rs 50,000/ a dah tur a ni.

2. Chief Minister Office leh Delhi Secretariat te a tlawh tur a ni lo.

3. Official file reng rengah, Delhi Lieutenant Governor-in pawmpuina leh phalna a pe a nih loh chuan a hming a ziak/sign tur a ni lo.

4. Thubuai a neih mekna chungchangah a ngaihdan a sawi zui tur a ni lo.

5. Thubuai kaihhnawih leh thuhretu emaw official file emaw reng rengah a in hnamhnawih thiang lo.