Mamata Banerjee-in ban a hreh lo tih a sawi

West Bengal chief minister Mamata Banerjee chuan an state-a junior doctor-te lungawi lohna lantirna kal zelah, state mipuite duh dan a nih takzet chuan CM a nihna aṭanga ban a hreh loh thu a sawi.

He thu hi nawrh huaihawt mek, junior doctor-ten State Secretariat-a meeting neihpuia a sawmnaa an inlan duh loh hnua a sawi a ni. CM chuan doctor-te chu lungawi lohna an lantir avangin an chungah action lak a ni dawn lo a, sorkar chuan boruak ṭha leh inremna a awm theih nan inbiakna neih a duh reng a ni, a ti.

CM chuan a lungawi lohna leh thinrimna zawk chu mipui mimir hnena dik lo taka thu thehdarh a, lungawi lohna lantir a nih ṭhinna zawk chu a ni tiin, heng thil hi vantlang mipuite chuan politics-a in beihna a ni tih hre loin an awih leh mai ṭhin a ni, a ti. Hetiang thil titute hian dikna ni loin thuneihna lalṭhutthleng chu an duh zawk a, hei vang hian thu belh chian dawl lo an thehdarh ṭhin tiin a sawi.

State Secretariat-a inbiakna neih turah hian doctor lam aiawhte hian an inbiakna neih lai hi live streaming a pek chhuah an phut a, mahse hei hi phalsak an nih loh vangin meeting neihna turah hian an lut duh lo a ni. Hetianga an phutna chhan chu inbiakna hi lang tlang taka neih an duh vang a ni tih an sawi.

CM Banerjee chuan live streaming an rem tih lohna chhan ber chu Supreme Court-a buaina thlengte ngaihtuah mek a nih vang a ni tih a sawi thung. Sorkar chuan an thil phut dang zawng zawng chu a remtihsak a, heng zingah hian inbiaknaah member 15 aia 33 telh tura an phutna pawh an remti a. Mahse live streaming a nih chuan lo record theih vek a ni dawn a, hei erawh chu an remti thei lo a ni.

Banerjee hian doctor-te chuan ti tura hrilh an nih angin an ti nia sawiin, "An zinga tam tak chuan inbiakna neih ngei pawh an duh. Mahse pawn lam aṭangin mi pahnih pathumin thurawn pe in, inbiakna neihpui suh u, meeting-ah kal suh u, an rawn ti a ni," a ti.