Naxal-te an ambush-naah sipai 7 an thi

Chhattisgarh-a Sukma district-ah Naxal helho chuan kar kalta Inrinni khan Special Task Force-te an ambush a, sipai pasarih an thi.

Helho hian state khawpui, Raipur aṭanga km 450 vela hla, Polampalli police station hnuaia Pidmel khaw ramhnuaiah sipaite hi lo changin an lo bei a, sipai pasarih an thih bakah midang 10 in hliam an tuar. Thi zingah hian platoon commander-ranked officer pawh a tel.

Helho leh Special Task Force-te hi darkar hnih zet an inkap zui a ni. Official-te chuan helho hi 300 vel an ni a, STF squad hi 70 vel an ni tih a sawi. Helho hian an tam hneh hle a, an tlansawn hmain an mi kahhlum leh hliam tuarte ralthuamte pawh an la niin an sawi bawk.

Additional Director General of Police (anti-Naxal operations) R K Vij chuan helho lakah beihpui thlak zui nghal a ni tih a sawi a, mahse khua a chhiat avangin duh angin an che chak thei lo tih a sawi. An inbeihna hmun hi Naxal helho chakna bial a ni a, fimkhur pawh a ngai hle tih a sawi.

Helho hian an mi thahte ruangah bomb kam an chin ṭhin avangin sipaite ruang senghawi hna pawh hi fimkhur taka kalpui a ni a, nimin khan ruang pawh hi an la khawm kim lo a ni.