President phalna hmu loin Governor-te'n state chhuahsan thei lo

Sorkar laipui chuan Governor-te zin chhuahna turah khuahkhirhna siamin, kum khatah an awmna state-ah ni 292 tal an awm tur a ni a, station pawna an zin dawnin President pawmpuina an neih phawt a ngai tawh ang.

Home Ministry-in dan thar a tihchhuahah hian, "President hnen aṭanga phalna la hmasa lo chuan station an chhuahsan tur a ni lo a, emergency leh thil eng emaw thleng bikah chuan President's Secretariat phalna an lak a ngai ang," a ti.

Sawi lawk loa zin chhuah thut a ngai a nih chuan, Governor chuan chiang takin a ngaihna chhan chu a sawifiah tur a ni. State pawn lama zinchhuah an dilna hi an zinchhuah hun tura bithliah hma kar khat aṭanga kar ruk chhungin Rashtrabati Bhavan-ah thawn tur a ni a, eng anga zin tur nge an ni tih te, official nge private tih leh, India nge ram pawn lama zin tur an nih tihte an sawifiah a ngai bawk ang.

Governor-te dilna thawnte hi Prime Minister Principal Secretary Nripendra Misra leh Union Home Minister Rajnath Singh-te pawhin an lo chhinchiah dawn a ni.

Private thil-a Governor-te zinchhuahna chu official anga lantir a nih lohna turin Raj Bhavan tin chuan President hnenah official-a an zinna chanchin kimchang a thawn ang a, thlak danglam a awm nih pawhin hriattir zel tur a ni ang.