PM Modi-a'n France aṭangin Germany a pan

Prime Minister Narendra Modi chu France-ah ni li a cham hnuin nimin khan Germany a pan. Germany aṭang hian Canada-ah a kal leh ang.

France rama PM Modi a cham chhung hian ram pahnihte hian an inlaichinna tihchangtlunna leh hmasawnna turin inremna thu­thlung eng emaw zat an ziak. Thawhdunna tur inremna an ziah zingah hian nuclear energy lama thawhdunna tur te, Delhi-Chandigarh inkara rel chak chi tlantirna tur leh Ambala-Ludhiana inkar rel kawng tihchangtlun tur te, Indian Railways leh France National Railways thawhdunna tur, Delhi-a School of Planning and Architecture leh Paris-a National Architecture Institute thawhdunna tur, vansang chanchin zirna kawnga ISRO leh French National Centre for Space Studies thawhdunna tur, Youth Affairs leh Sport of India leh France sorkara Sports, Youth Affairs, Public Education leh Community Life Ministry thawhdunna turte a tel.

PM hian Germany-ah Chancellor Angela Merkel hmuin, Hannover Fair a hawng dawn a, hei hi capital goods leh technology lama khawvela fair lian ber a ni. Modi hian zalenna sualtu, Netaji Subhash Chandra Bose-a tupa, Surya nen Berlin-ah an inhmu bawk ang.

Germany Chancellor Merkel chuan PM Modi leh a zuitute pual hian zanriah a buatsaih sak dawn a ni. PM hi India aṭangin mi 120 velin an zui a, zanriah buatsaihah hian Germany-a sumdawng leh industry lian aiawhte pawh an tel beisei a ni.