Brazil aiin India ramah Hripui kai an tam tawh zawk

India ramah hripui a hluar zual zel a, nimin thleng khan mi nuai 42 chuangin hri an kai tawh a, nuai 32 chuang enkawl dam tawhin mi nuai riat chuangin hri an la kai mek. 

Ministry of Health and Family Welfare-in nimina report an tihchhuahah Pathianni khan hri kai hmuh chhuah thar 90,802  an awm leh tih tarlangin ni hnih chhung a zawnin hri kai hmuh chhuah thar sing kua chuang an awm tawh a ni. Nimin report thleng hian India ramah hri kai hmuh chhuah 42,04,613 an awm tawh.

Hri kai hmuh chhuah thar hi tam hle mah se enkawl dam pawh an pung ve zel a, darkar 24 chhungin mi 69,564 lai enkawl dam tawhin hei nen hian hri kai tawh zinga 32,50,429 chu an dam leh tawh a ni. Ni hnih chhungin hri kai enkawl dam hi nuai 1.43 an awm a ni. 

Nimin report-ah hian Covid-19 vanga thi mi 1,016 awm belh lehin, India ramah hri thihpui 71,642 an awm tawh a; hri kai mek  8,82,542 an la awm bawk.

Enkawl dam rate hi 77.31% a ni a, hri kai mek rate hi 20.99% vel niin thihpui rate chu 1.70% a ni thung. Hri kai mek aiin enkawl dam tawh hi a let 3.7 velin an tam zawk a ni.

India rama Covid-19 kaite enkawlna  hmun lian ber, Bengaluru International Exhibition Centre-a Covid Care Centre siam chu September 15-ah khar a ni dawn.

State sorkarin hri kai zingah taksa lama harsatna nei lo, asymptomatic and mildly symptomatic patient-te chu in lama in enkawl a phalsak tak avangin, hetiang mi enkawlna tur siam, khum 10,000 awm theihna centre-ah hian enkawl tur an awm tawh loh avangin khar a ni dawn a ni. He centre-a bungraw hrang hrang, khum, fan, dustbin, leh bungraw dangte chu sorkar hostel leh hospital-ahte a thlawnin sem a ni ang. 

Indian Council of Medical Research (ICMR) chuan nimina report an tih­chhuahah Pathianni khan sample 7,20,362 an endik tih an tarlang a, ni eng emaw zat chhung chu ni khata sample nuai 10 chuang an endik hnuah nimina report-ah hian a tlahniam hret a ni. Hri len ṭantirh aṭanga nimin report thleng hian sample 4,95,51,507 endik a ni tawh. 

Sample endikna tura laboratory pawm­pui ICMR hian 1,655 a nei tawh a, chung zinga 1,028 chu sorkar laboratory niin 627 chu private laboratory a ni thung.

India ram State/UT zinga hri kai tam berna Maharashtra-ah chuan nimin sorkar report tihchhuahah hri kai hmuh chhuah thar 23,350 an awm leh a, hei nen hian hri kai hmuh chhuah 9,07,212 an awm tawh.

Heng zinga 6,44,400 hi enkawl dam an ni leh tawh a, mi 24,604 chuan thihpui tawhin 2,36,208-in hri an la kai mek a ni. 

World Health Organization (WHO)-in a tarlan dan chuan India ram hi thla khat dawn chu khawvel ram zinga ni khata hri kai hmuh chhuah tam ber ram a ni tawh a,  hri kai tam lama pathumna ni ṭhin kha tunah chuan pahnihna ni tawhin, Brazil aiin India ramah hri kai an tam tawh zawk a ni. Hetih lai hian Covid-19 thihpui erawh Brazil ramah an tam zawk thung.