FCRA licence tihtawp zingah Kristian group pali tel
Union home ministry chuan kuminah NGO parukte Foreign Contribution Regulation Act (FCRA) licence a tihtawpsak a, heng zingah hian Kristian NGO pali a tel.
FCRA licence hmang hian NGO te chuan ramdang (foreign) aṭangin fund (pawisa) an dawng thei a ni. Home ministry-in licence a tihtawpsak zinga Kristian NGO palite hi Jharkhand-a Ecreosoculis North Western Gossner Evangelical, Manipur-a Evangelical Churches Association (ECA), Jharkhand-a Northern Evangelical Lutheran Church leh Mumbai-a New Life Fellowship Association (NLFA)-te an ni.
Heng NGO te FCRA licence tihtawpsak a nih avang hian ramdang aṭangin ṭanpuina pawisa thawn theih a ni tawh dawn lo a ni. Ministry hian eng vanga tihtawpsak nge tih chiang takin a tarlang lo. Heng NGOs paruk FCRA licence hi kumin February 10 khan tihtawpsak a nih thu home ministry data-ah ziah lan a ni.
Anni NGO pali bakah hian NGO dang pahnih Rajnandgaon Leprosy Hospital and Clinics leh Don Bosco Tribal Development Society-te FCRA licence chu home ministry chuan a tihtawpsak bawk a ni. Kum 2017 chho vel aṭang khan Kristianna kawihnawih thila ramdang aṭanga ṭanpuina pawisa inpek theihna licence hi sorkar laipui chuan zawi zawiin a tihtawpsak chhoh nual tawh a ni.
FCRA hnuaiah hian NGOs 22,457 an awm a, heng zinga NGO 20,674 te FCRA licence chu tihtawpsak an ni a, NGO 6,702 te licence erawh an licence neih hun chhung a tawp ṭep tawh thung a ni.