Kejriwal-a'n Chief Minister a nihna aṭanga ban a tum

Delhi chief minister leh Aam Aadmi Party (AAP) hotu, Arvind Kejriwal chuan Delhi Chief Minister a nihna aṭangin ni hnih hnuah a bang dawn tih Pathianni, September 15 khan a sawi.

Kejriwal chuan an party aṭangin amah thlaktu tur hi ruat a ni ang a, ni hnih chhungin CM thar tur chu thlan fel hman a ni dawn tih a sawi. Hei bakah nakum February thlaa assembly inthlan an neih tur chu sawn hmaa, kumin November thlaa Maharashtra leh Jharkhand ruala inthlan neih ve a phut nghal bawk.

CM hian Supreme Court-in a bail a phalsak hnua jail aṭanga a chhuah hnua a thusawi hmasa berah, "Ni hnih hnuah CM ka nihna aṭangin ka bang dawn. Mipuiten an thutlukna an siam hma chu CM dinhmun hi ka luah tawh lo ang. Kawtthler leh in tinah kalin, mipuite thlawpna leh pawmpuina ka hmuh hmachu CM ka ni tawh rih lo ang," a ti.

AAP hruaitu lu hian Manish Sisodia, liquor police case avanga man tawk tun hnaia bail hmanga lo chhuak ve tho pawh chuan in ruat tharna a awm hma chuan sorkar a dinhmun pawimawh chelhte a chelh chhunzawm dawn rih lo tih a sawi bawk.

Kejriwal chuan BJP kaihhruai sorkar laipui chu na taka bei zuiin, British-in India an awp lai aia sual leh rawng zawkah a puh. "Mi ṭhenkhat chuan SC-in khuahkhirhna a siam avangin hna an thawh theih an rin loh thu an sawi a, kan laka hrekbehna turin an theih dan hrang hrangin an che a ni. Ka dik nia in hriat chuan a tam thei angin min vote rawh u. Mipuiten min thlan tlin hunah chauh CM dinhmun hi ka luah leh ang," a ti. AAP MLA-te chu chief minister thar tur thlangin an inhmukhawm thuai dawn tih a tarlang nghal bawk a ni.

Chief Minister chuan sorkar laipuiin a tum ber chu AAP leh Arvind Kejriwal huaisenna tukdawl a, tih chhiat a ni tiin, "Jail-a min dah avangin kan party leh Delhi-a kan sorkar chu tichhe mai turah an inring a ni. Mahse kan party kan tlukchhiat phah lo. Constitution humhim ka duh avangin jail aṭang khan banna ka thehlut duh lo a ni. An ruahmanna leh thil tumte hlawhchham tir ka duh a ni. SC pawhin jail aṭangin engvanginnge CM dinhmun a chelh chhunzawm theih loh ang, tiin sorkar laipui pawh a zawt reng a, jail aṭangin sorkar a enkawl thei tih a rawn finfiah zawk a ni," a ti.