Andaman & Nicobar Island khawpui Port Blair hming thlak

Sorkar laipui chuan September 13 khan Andaman & Nicobar Island khawpui, Port Blair chu "Sri Vijaya Puram" tiin a thlak.

Union home minister Amit Shah chuan khawpui hming thlak a nihna chhan hi sawifiahin, he thutlukna hi ram awpbeh kan nihna aṭanga hnam zalen kan nih entirna a ni, a ti.

Amit Shah chuan "PM Narendra Modi hmathlir bawhzuina ram awpbeh kan nih hnua kan zalen tih entirnan, Port Blair chu 'Sri Vijaya Puram' tia thlak kan rel ta a ni," tiin X ah a sawi. A hming hmasa chuan min awpbettute sulhnu a neih laiin, Sri Vijaya Puram tih erawh chu zalenna sualna ṭanga hnehna ropui tak chan leh, hemi kawnga A&N Islands in chanvo pawimawh tak a neihna tilangtu a ni, tiin a sawi.

Port Blair hming thar hi kum zabi 7 aṭanga 13-na thlenga Southeast Asia-a maritime dynasty ramhruaitu ropui tak, Sri Vijaya Empire hming chawia thlak a ni.

"He island hi Chola Empire lawng sipai hmunpui a ni ṭhin a, tunah erawh chuan ram hmasawnna leh changkanna atana hmun pawimawh tak a ni tawh. Hei bakah hian Netaji Subhash Chandra Bose-a'n hnam puanzar a lo zar pharh hmasak berna hmun a ni a, kan ram zalenna sualtu zinga mi Veer Savarkar leh midangte lungin lo tan tawhna hmun a ni, " tiin Shah chuan a sawi zui.

Port Blair hi British colonial navy official, Captain Archibald Blair, Andaman leh Chagos Archipelago zirchiangtu hmingchawia phuah a ni.East India Company chuan Blair hi kum 1788 khan Andaman Sea hi endik turin a tir a, kum 1789 ah he island hi a thleng a ni.