CBI-in RG Kar principal hlui Sandip Ghosh man

Central Bureau of Investigation (CBI) chuan Inrinni liam ta khan Kolkata-a RG Kar Medical College and Hospital principal hlui Dr. Sandip Ghosh leh police officer Abhijit Mondal chu August 9-a hospital seminar hall chhungah doctor zirlai pawngsual leh thah a nih kaihhnawihah an man.

Gosh hi man a nih hma pawh hian agency hnuaiah eirua puhna kaihhnawihah judicial custody a dah a lo ni tawh a ni. CBI bakah Enforcement Directorate(ED) chuan sum tihchingpen chungchangah Ghosh hi an chhui mek bawk.

CBI chuan Ghosh hi pawikhawihna thleng chhuina tibuai thei zawng leh, finfiahna awmte tichhia leh, FIR thehlutna tur tikhawtlaiahte puhin, thubuai eng emaw zat an siamsak a ni. Local court-ah Ghosh hi pawngsual leh tualthah chungchanga chhui chianna nei turin a lo ti tawh bawk.

Tala police station-a officer in charge Mondal pawh agency te thu zawhfiahnate an duhthusam anga a chhan loh avangin man a ni ve bawk. Mondal hi pawikhawihna thleng chungchangah finfiahna awmte hi tidanglam leh, FIR ziahluh tur tihkhawtlaisakah puh a ni. Pawikhawihna thlenna hospital hi Tala police station huam chhunga awm a ni.