Hindu hruaituin Kristian leh Muslim-te Fa nei theilo tura siam a duh

All India Hindu Maha­sabha vice presi­dent, Sadhvi Deva Tha­kur-i chuan Pathianni khan ram chhungah Kristian leh Muslim-te chu an pung zel a, hrek an nih theihna atan an laka emergency puang turin sorkar laipui chu a duh thu leh fa nei thei loa insiam luih tir nise a duh tih a sawi.

Thakur-i chuan sa­khaw pahnih zuitute hi fa nei thei lo tura siam a duh thu a sawi rual hian, Hindu-te chu an pun chak theihna atan fa nei tam turin a chah a, khawvel huapa thawm nei thei tura an pun a ngai a ni, a ti.

Hindu hruaitu chuan Hindu pathian leh pathiannu limte chu mosque leh biak-inahte dah tel se a duh thu a sawi bawk.

Congress hruaitu, Abhisghek Manu Singhvi chuan Shiv Sena-te'n Muslim-te vote nei lo tura siam an rawtna leh, Hindu Mahasabha hruaituin fa nei thei lo tura Kristian leh Muslim-te insiam luihtir a rawtna chu na takin a sawisel a, hemi chungchanga BJP kaihhruai sorkar laipui a ngawi tlat chu a hriatthiam loh thu a sawi.

Singhvi chuan a Twit­ter-ah hemi hi thu sawi chhuakin, kum khat chhunga leka chi leh sakhaw inhuatna thleng zawnga thusawi a tam ta lutuk chu mak a tih thu leh, heti chunga Prime Minister Narendra Modi leh BJP-te an la ngawi reng a, action engmah lak a la awm lo te chu mak a tih thu a sawichhuak.