Ram hrang hrangin Lakhvi chhuah an dem

Pakistan court-in kum 2008 November 26-a Mumbai khawpui beihnaa a ruahmantu bera puh, LeT commander Zaki-ur Rehman Lakhvi a chhuah zalen chu ram hrang hrangin an dem thu an sawi.

France President Francois Hollande chuan Mumbai beihnaa a mawhphurtu ber jail aṭanga chhuah zalen a ni chu mak a ti hle tih a sawi a, hemi chungchanga a ngaihdan pawh hi Prime Minister Narendra Modi-a'n an ram a tlawh ṭum khan a lo hrilh a ni.

26/11-a firfiakte pawikhawihna thlen ṭuma an mi leh sate chântu, US leh Israel pawhin Pakistan court thutlukna siam dan chu na takin an sawisel. US state department chuan Mumbai beihna ruahmantu ber Lakhvi bail-a chhuahtir a ni chu an ngaihven hle tih sawiin, Pakistan senior official-te chu Lakhvi chungchang hi hun eng emaw kalta aṭang khan an lo sawipui tawh niin a tarlang.

State Department thupuangtu Jeff Rathke chuan, "Pakistan sorkar chuan Mumbai beihnaa inhnamhnawihte ro relsak an nih theihna tura thawhpui a lo intiam tawh a ni. Mumbai beih ṭuma pawisawi lo nunna chan ta, mi 166-te tan rorelna dik hlenchhuak ngei turin Pakistan chu kan duh a ni," a ti. He pawikhawihnaa thi zinga paruk chu America mi an ni.

India rama Israel ambassador Daniel Carmon pawhin Lakhvi chhuah zalen a nih avanga an lawm loh thu a sawi a, hei hi firfiaka chetna do mekna kawngah thil lawmawm lo tak a ni, a ti. Carmon chuan, "Isreal chuan Zaki-ur Rehman Lakhvi chhuah a ni hi mak a tiin pawi a ti hle a ni. He pawikhawihna thlengah hian Israel mite leh Jewish centre, Nariman House chu bitum an ni," a ti. Thi zingah hian rabbi Gavriel Holtzberg leh a nupui an tel.