SBI-in home loan punna rate tihniam

State Bank of India chuan home loan interest rate chu 0.25% emaw, 25 basis point-a a tihhniam thu Pathianni khan a sawi.

SBI chuan thuchhuah siamin, loan puk tharte tan interest rate hi tihhniam a ni a, hmeichhiate tan rate chu base rate, kum khatah 9.85 a nih tur thu a sawi. Hei bakah hian sum puktu dangte tan interest rate chu 9.90% a ni dawn tih a sawi a, hei hi minimum lending rate aiin basis point panga-in a sang zawk a ni.

Rate thar hi April 13 leh a hnu lama home loan late tan hman nghal theih a ni ang.

SBI-in 'HER Ghar' hnuaia hmei­chhia tana home loan interest rate a lo ruahman ṭhin chu 10.10 % niin, midangte tan 10.15% a ni ṭhin tih a sawi.

HDFC Ltd pawhin kar kalta Zirtawpni aṭang khan home loan rate chu 0.2% in a tihniam a, loan puk mek leh a puktu thar tan pawh a punna hi 9.9% a a tihniam a ni. Anni bakah hian bank dang eng emaw zatin a interest rate hi 0.25% velin an lo tihniam tawh bawk.