Rafale jet fighter 126 leina tur inremna ṭhiat

Centre-a BJP kaihhruai NDA sorkar chuan sorkar hmasa, UPA sorkarin dollar tluklehdingawn 20 senga France ram aṭanga Rafale fighter jet 126 leina tur, Medium Multi-Role Combat Aircraft (MMRCA) deal a lo siam tawh chu a ṭhiat.

Defence Minister Manohar Parrikar chuan Rafale fighter jet-te hi Indian Air Force (IAF) te hman lai, MiG-21 thlakna tur chuan a ṭha tawk lo nia a ngaih thu a sawi. MiG-21 te hi an hlui tawh hlawm a, kum 6-10 ah chuan thlak vek an ngai tawh dawn a ni.

Parrikar chuan MiG-21 thlakna atan hian India ram leilunga siam, Light Combat aircraft Tejas chu caterogy ang khat a nih avangin hman a ni zawk ang, a ti. Rafale hi chu a lian zawk a, a range pawh sei zawkin ralthuam pawh a phur tam thei zawk a ni. "Kum 15 kalta chhung khan aircraft technology thar hi engmah lei a ni lo. IAF hian fourth generation aircraft a mamawh a, fifth generation aircraft kan beisei hi chu kum 10-15 vel a la ngai a ni," a ti.

Prime Minister Narendra Modi-a'n kar kaltaa France ram a tlawh ṭum khan France President Francois Hollande nen Paris-ah inkawmin, Rafale fighter jet 36 leina turin inremna an ziak thar a ni.

Defence Minister chuan Rafale fighter hi 36 bak a dang mamawh a nih pawhin inremna hi ram pahnih sorkarte indawrna kaltlanga siam a ni tawh dawn tih a sawi. Rafale figher 36 te hi kum hnih chhungin France ram aṭangin rawn thawn luh hman beisei a ni.