Bawng talh khap duhlohna lantir nan Chennai-ah bawngsa festival buatsaih

Tun hnaia Maharashtra-a bawng talh leh a sa zawrh khapna dan siam duhlohna lantirin, nimin khan Tamil Nadu-a eptu pawl, Dravidar Kazhagam (DK) chuan 'Mangalsutra (thaali) removal' leh bawngsa festival an buatsaih.

DK vice-president Kali Poongundran chuan DR Ambedkar piancham 125-na lawmna atan nimin khan Vepery-a an party office-ah he hun hi a buatsaih a ni. Thawhṭanni khan All India Hindu Mahasabha chuan DK hruaitu thil tih tum hi dodalin, Madras High Court-ah petition an thehluh a, a thiltih tum chuan Hindu-te rilru a ti na thei a ni, an ti.

Mahse High Court chuan ram danpui hnuaiah mi tinte'n an thil duh zawng lantir turin zalenna an nei a ni tiin, DK hruaitu hi phalna a pe. Hetihlai hian Chennai police-te chuan DK hruaitu thil tum hi khapin, a lakah thubuai eng emaw zat an ziak lut.

Bawngsa festival buatsaih phalsak a nih hnuah, Justice Paranthaman chuan DK hruaitu hi venhimna pe turin police-te a hriattir bawk.