May 9-ah Net Neutrality chungchanga panel report thehlut dawn
Internet hmangtute tana website hrang hrangte ang khat veka an hman theihna, 'Net neutrality' chungchang chu ram pumah buaipui leh sawi hlawh a ni mek a, hemi chungchang enfiah tura sorkarin expert panel a din chu May 9-ah report thehlut hman tura hriattir a ni.
Telecom Minister Ravi Shankar Prasad chuan, Telecom Regulatory Authority of India (Trai)-in Net neutrality chungchangah hian mi thiamte a rawn mek a, report nghah mek a ni, a ti. "Trai hi advisory body a ni a, an rawtna siamte chu kan zahsak a ngai a ni," a ti.
Net Neutrality chu eng nge?
Net neutrality hi mitin te'n internet speed leh a hman man inang veka website zawng zawng an luh theihna, pawl emaw, company emaw te'n sum an pek avanga duhsak bik an nih lohna tura khairualna a ni. Hemi chungchang hi khawvel pumah buaipui a lo ni tawh ṭhin a, tunlai hian India ramah buaipui mek a ni.
Net neutrality kalphung hi telephone line hnathawh dan aṭanga lak a ni a, telephone line aṭang chuan khawi operator aṭang pawhin mi tupawh bia ila ang khat vek a ni. Operator-te chuan sorkarin a phut a nih loh chuan a hmangtute tan number block bik an nei ngai lo.
Hemi zulzui hian Internet service provider (ISP) te pawhin internet hman dan hi an kalpui a, hei hi Net neutrality an ti. ISP hian an server katlanga internet hmangte chu khuahkhirhna hran a siamsak lo a, internet hmangtu chuan khawi website pawh lut se, speed ngai reng a hmang thei a, eng website leh service pawh an luh duhah chuan a hrana sum chawi ngai tawh loin an connect thei vek a ni.
Net neutrality a pawimawhna
Net neutrality hi hman a nih loh chuan ISP hian web company-te chu an website chak zawka luh a nih theihna turin sum an chawitir thei a, sum pe duh lote chu an website luh dawnin a muang a, hawn a har tawh dawn a ni. Hei hi rampawn lam company leh company tenau zawkte'n nasa takin an tuar thei dawn a ni.
Tun hnaiah India rama Telecom company lian, Bharti Airtel chuan 'Airtel Zero' plan a siam thar a, hei hian 'Net neutrality' kalphung a kalh avangin rampumah buaipui a hlawh chho nghal hle.
Airtel Zero hi open marketing platform a ni a, he plan hnuaiah hian an hnena data charge chawi website-te chu duhsak bik an ni a, awlsam bika luh theih tura dah an ni. He plan zawmtu website-te hian Airtel-ah an chawi ang a, an website hmangtu, mipuite'n an data plan emaw, a hranpain emaw pawisa chawi a ngai tawh lo ang. Plan zawm ve lo website-te chu data plan hmangin emaw, a hrana pawisa chawiin emaw a luh theih chauh thung dawn a ni.
Airtel Zero plan chu mipuite'n website leh app hrang hrangte a thlawna an hman theih tura ruahmanna nia a lan laiin website neitute leh app neitute'n an hnenah sum an pek a ngai thung dawn a ni. Hei vang hian website leh app neitute'n Airtel hnena an pawisa chawi phuhruk nan an website leh app hmangtute chu pawisa an chawitir a hlauhthawnawm a ni. Hei hi mipuite chuan net neutrality palzutna a ni, tiin Airtel chu Net neutrality palzutah an puh a, nasa tak an sawisel hnuah Flipkart pawhin Airtel Zero zawm a tumna chu a sut leh tih nimin khan a sawi.
Trai hnenah e-mail nuai thum chuang thawn a ni
Ramchhungah Net neutrality hi kalpui phutin, telecom regulator Trai hnenah Savetheinternet.in website kaltlangin darkar 48 chhungin mi nuai 3 chuangin e-mail an thawn tawh a ni. E-mail thawntute hian sorkar laipui chu India rama net neutrality humhalh a, website duhsak bik siam lo turin an ngen.
Sorkarin committee a din
Net neutrality chungchang chu sorkar mawhphurhna a nih avangin sorkar laipui chuan enfiah a, zirchiang turin member paruk awmna committee a din ta a ni. Telecom Minister Prasad chuan he committee hian net neutrality chungchang hi uluk taka zirin, a hlawkna leh ṭhatna te, a ṭhat tawk lohna lai te, a dan leh technical chungchangte zirchiangin, May 9 hian report thehlut tura hriattir an ni tih a sawi.