Mamata-in junior doctor-te meetingah a sawm leh

Doctor lungawi lohna lantir mekte nena inbiak an tumna vawihnih a hlawhchham hnuah, West Bengal sorkar chuan an harsatna leh lungawi lohna thlente ngaihtuah ho leh turin meeting neihpuiah a sawm leh.

Chief secretary Manoj Panth chuan doctor, lungawi lohna lantir te hnenah hian email thawnin, nimin tlaia meeting neih pui atan a sawm a ni. Hei hi meeting neihpui tura an sawm vawi nga na leh, a tawpna tur a ni tih a sawi. September 9-a Supreme Court-in thupek a lo tih chhuah tawh angin, doctor-te chu an hna zawm tawh turin a ngen bawk.

Junior doctor-te hian nimin, Thawhṭanni thleng khan nawrh hi an la chhunzawm a, Swasthya Bhawan Health department headquarters kawt ah ṭhu chungin(sit-in) lungawi lohna an la lantir a, hei hi a zawna ni riat an lantirna a ni tawh. RG Kar Medical College and Hospital-a doctor zirlai hmeichhia pawngsual leh thah an duh lohna an lantirna hi nimin kha a ni 37-na a ni tawh bawk.

Nawrh huaihawtte chuan Kolkata Police Commissioner leh State Health Official ban a nih hma chu nawrh chu chhunzawm zel an tum. "Kan ngen leh phut angte tih hlawhtlin a nih hma chu nawrh chhunzawm zel kan tuma, state sorkar hian he thil thleng hi a nih dan tur angin a ngai puithu lo a ni," tiin lungawi lohna lantir zinga doctor chuan an sawi.

Chief minister Mamata Banerjee chuan Inrinni khan hrilh lawk lovin an nawrhna hmunah hian tlawhin, doctor-te hnenah hian an ngen ang leh an phut te chu tih hlawhtlin ngei a tum thu a hrilh.

Doctor-te hian Chief Minister-in meeting nei tura a sawm chungchangah, a chenna kawta darkar thum chuang an nghah hnu leh zah lo taka ṭin tura an tih hnu lawkah meeting tura a sawmna hi an hrilh hre ve leh hnuhnawh niin an sawi a ni. Live-streaming nei loa meeting neih pui tura Banerjee-in a dilna pawh an pawm vek hnuah, minister of state for health Chandrima Bhattacharya hnena hrilh a nih chuan meeting nei tur hian a tlai tawh tia an lo hrilh thu an sawi bawk.

Banerjee leh Junior doctor-ten a hmaa meeting neih an lo tum tawh chu live-streaming leh member tel thei zat tur an tihah te inremna an neih theih loh avangin a tlawlh a ni.