Modi-a sorkarin an hun chhungin 'One Nation, One Election' kalpui tum

Ram puma a ruala inthlan buatsaih, Parliament-ah pawh hun rei tak an lo sawi ho tawh, 'One Nation, One Election' chu prime minister Narendra Modi kaihhruai sorkar chuan an hun chhung ngei a kalpui hman an tum nia sawi a ni.

Kumin Independence Day-a thu a sawiah khan PM Modi chuan a sawi chhuak a, sorkar pawhin hman ngei a tum thu a tarlang.

Sorkar laipui chuan President hlui, Ramnath Kovind-a chairman-na hnuaiah he ruahmanna ngaihtuahtu tur committee pawh din tawhin, anni pawhin report an thehlut tawh bawk. Panel chuan ahmasa ber atan Lok Sabha leh state inthlante chu neih hmasak a, hemi hnu ni 100 chhunga local body inthlante neih chhoh a rawt a ni.

Law Commission lam pawhin hei hi an pawmpui thuai rin niin, Commission hian 2029-ah sorkar siamna tura inthlan neih ngaihna pathum , Lok Sabha, State Assembly leh local body - municipalities leh Panchayats te chu a ruala inthlan neih chhoh a rawt a rin a ni bawk.

PM Modi chuan thla hmasaa I-Day lawmnaah One Nation, One Election a ṭul thu sawiin, a hran hrana inthlan buatsaih fo ṭhin chu ramin hma a sawnna turah harsatna a siam a ni, a ti. BJP hian inthlan dawna an manifesto-ah pawh 'One Nation,One Election' hman an lo tiam a, party dangte pawhin lungrual taka an pawmpui an beisei a ni.