AAP hruaituten New Delhi CM thar tur ngaihtuah

Delhi chief minister, Aam Aadmi Party (AAP) hruaitu Arvind Kejriwal-a'n chief minister a nihna aṭanga a ban tur thu a puan tak avangin, AAP hruaitute chuan a thlaktu tur an ngaihtuah thuai a ngai dawn a, nimin tlai khan political affairs committee pawhin meeting an nei nghal a ni.

AAP hruaitu leh deputy chief minister hlui, Manish Sisodia te chu Kejriwal chenna inah kalin, chief minister ni thei tur awmte an sawi ho tawh bawk.

Kejriwal thlak a, Delhi Chief Minister thar tura hming sawilan zingah hian minister ni lai Atishi, Gopal Rai, Saurabh Bharadwaj, Kailash Gahlot te bakah, Delhi Assembly deputy speaker Rakhi Birla leh Kejriwal-a nupui, Sunita Kejirwal te hming sawirik a ni.

Kejriwal hian Pathianni khan CM a nihna aṭanga a ban tur thu leh, assembly inthlan pawh neih hma a, kumin November thlaa neih a rawt a ni. BJP lamin an puhna hrang hrangte a dik lo tih pawma, mipuite an rin tawk a, an aiawh tura an thlan tlin leh hunah chauh chief minister a ni leh dawn a, Manish Sisodia pawh deputy chief minister a ni leh ang, tiin a sawi.