President-in Farm bill pathum a pawm
President Ram Nath Kovind chuan sawisel hlawh tak farm bill pathum chu dan (law) a chan tirna turin Pathianni khan a pawmpuina a ziak.
Heng farm bill pathumte hi Farmers' Produce Trade and Commerce (Promotion and Facilitation) Bill, 2020, Farmers (Empowerment and Protection) Agreement on Price Assurance and Farm Services Bill, 2020 leh Essential Commodities (Amendment) Bill 2020-te an ni a, Pathiannia president-in dana chan tir a rem tih tak avangin reilote hnuah he dan thar hi hman a nih thuai rin a ni.
Loneitute chuan he farm bill hi an duh lo hle a, Farmers' Produce Trade and Commerce (Promotion and Facilitation) Bill, 2020 hian state leh state inkara indawr tawn theihna awm ṭhin chu a nuai bo dawn niin an sawi. Loneituten state pawn lama buh leh thlai an thar thawn chhuah chungchangah Agriculture Product Market Committee (APMC) chuan thuneihna sang an nei tawh dawn nia sawi a ni bawk.
Farmers (Empowerment and Protection) Agreement on Price Assurance and Farm Services Bill, 2020 hi loneituten an duh loh chhan ber chu an thlai thar man tur bithliah chungchangah mimal, pawl,sumdawng liante an inrawlh thei dawn nia sawiin, heng mi hausate hian an duh duhin buh leh thlai thar man an bithliah thei dawn niin an sawi.
Hei bakah hian Essential Commodities (Amendment) Bill 2020-ah hian cereal, pulses, oilseed, edible, oil, onion, potato te chu essential commodities an ni tawh dawn lo tih sawiin, heng thlaiah hian khuahkhirhna siam a ni dawn tawh lo a ni.
Hengte avang hian ram chhunga loneitute chuan essential commodities-a tel lo tur thlai tharte hi mi dangin an chheprelh thei nia sawiin, he bill hi an duh lo hle bawk a ni.