Parliament chhungah leh pawnah Loneitute aw hupbeh sak a ni : Rahul Gandhi

Congress hruaitu Rahul Gandhi chuan nimin khan social media kaltlangin na takin sorkar a bei a, "Parliament chhungah leh pawnah loneitute aw hupbeh sak a ni," tiin  kar liam taa Parliament-a pawm tak farm bill chu a sawisel.

Rahul Gandhi hian twitter-ah media report chu tweet-in, chumi chungchang chu caption-ah hmangin,"Agriculture law hi loneitute tan chuan thi tura rorelsakna a ni. Parliament chhungah leh pawnah loneitute aw hupbeh sak an ni. Hei hi  democracy chu India ramah a thi tawh  tih finfiahna chu a awm e," tiin a sawi.

Pathiannia President Ram Nath Kovind-a'n a pawmpui tak farm bill pathum duh lohna kha ram chhung hmun hrang hrangah lantir chhunzawm a ni zel a, lo neitute leh eptu lam party-te chuan nasa takin an dodal a ni.

Punjab CM Captain Amarinder Singh chu dodaltu langsar ni bawkin zalenna sualtu Shaheed Bhagat Singh pianna khua Khatkar Kalan-ah sit-in protest a nei a, Karnataka-ah pawh nimin khan loneitu pawl chuan state pum bandh an huaihawt a, hei hi Congress party chuan an thlawp bawk. Nimin zingah khan Delhi khawpuia awm India Gate bulah tractor hal a ni a, Tamil Nadu-a Kancheepuram-ah chuan DMK chief MK Stalin kaihhruainain bill duh lohna lantir a ni bawk.