AAP hruaitu hlui pahnihin non-political group an din

Delhi-a rorellai, Aam Aadmi Party (AAP) kalphung leh an pawl hruaitu ber, Arvind Kejriwal-a laka lungawi lo, hruaitu hlui pahnih Yogendra Yadav leh Prashant Bhushan-te chuan Thawhlehni khan non-political group an din thar. An pawl din thar hi a hmingah 'Swaraj Abhiyan' tih an vuah.

Thawhlehni khan convention, Swaraj Samwad neiin, state hrang hrang aṭangin Yadav leh Bhushan thlawptute an kalkhawm a, darkar riat zet meeting hi an nei a ni.

Convention-a kalte hian AAP chhuahsan a, political party thar din chungchangah vote an la a, mahse an zinga 70% vel chuan party thar din an duh lo a, 25.45% vel chauhin party thar din an duh. Hemi hnu hian non-political group 'Swaraj Abhiyan' dinna tur resolution an pass ta zawk a ni.

Yadav chuan AAP mi leh sa an la ni reng a, party chhuahsan an tum rih lo tih a sawi. Ram­chhung hmun hrang hranga anmahni thlawptute berawnin, thla ruk hnuah political party thar din chungchangah thutlukna an siam dawn tih a sawi.

Bhushan pawhin thu sawiin, AAP hruaitu leh Delhi Chief Minister Arvind Kerjiwal chu ngaihdan hran a awma pawm thiam loha a puh a, a mimal ngaihdan ang chauha party kalpui a tum avangin party chhungah khi a awm phah a ni, a ti.

'Party kalphung chungchanga zawhna neite chu party hruaitu dinhmun aṭangin paihthlak an ni nghal zel a, meeting kan buatsaih avang hian keini pawh hi party aṭanga hnawhchhuah kan ni mai thei a ni. Tuna AAP kalphung chu party i sawisel hlek a nih chuan hnawhchhuah i ni ang tih a ni' tiin a sawi.

AAP kalphung leh party hruaitu Kejriwal an sawisel avangin Yadav leh Bhushan-te hi thla hmasa khan AAP-a post pawimawh an chelh aṭangin ban an ni a, mahse party aṭang chuan hnawhchhuah an ni lo.

Nimin tlai khan AAP hruaitute chuan Yadav leh Bhushan-te chungchang ngaihtuahin meeting an nei a, thutlukna pawh an siam nghal ang.