Airtel-in net neutrality a thlawp

Bharti Airtel chuan a platfom thar, Airtel Zero in net neutrality a palzut nia sawi chu thil hriatsual a ni tiin, net neutrality chu an thlawp tih a sawi.

Bharti Airtel-in open marketing platfom thar, Airtel Zero a hawng a, hei hi customer-ten data charge awm loa mobile application an hman theihna tura tih a ni. Mahse an hnena data charge pe website-te duhsak bik leh luh awl bika dah an nih bakah, sum chawi ve lote website-ah chuan internet hmangtuten an data plan emaw, an balance aṭangin emaw a hrana chawia luh a ngai dawn nia sawi a ni.

Airtel chuan hei hi chhangin, Airtel Zero-ah hian data pack nei leh nei lo tan pawh toll-free service-te chu a thlawn veka en theih a ni dawn a, toll free platform zawm lo site-te pawh block emaw, thliar hran bik emaw na a awm chuang lo niin a sawi.

E-commerce lian, Flipkart pawhin Airtel Zero hi zawm tumin a ngaihtuah mek a, mahse ramchhung hmun hrang hranga net neutrality buaipui a nih tak avangin a zawm tum pawh hi a ṭhulh leh a ni. Flipkart co-founder Sachin Bansal chuan net neutrality chu an thlawp tlat tih sawiin, India rama company zawng zawng lakah net neutrality hi hman a nih theihna turin an bei zel dawn tih a sawi bawk.

Net neutrality hi sorkar leh internet service provider-ten internet-a data zawng zawngte ang khat veka an enna a ni a, user-te sum chawi turah te, site content, platform, application leh mode of communication-ahte thliarhranna awm lohna a ni.

Ramchhung hmun hrang hrangah net neutrality kalpui phutna a awm zel avangin sorkar laipui pawhin zirchiangtu tur committee pawh a din tawh a ni.