Indian Army-in indo thlen palh theihna hmunah tank a dah

China sipaite an chet palh thulha venna turin Indian army chuan indo thlen palh theihna hmun Chumar, Depsang and Chushul sector-ahte T-90 leh T-72 tank a dah.

Hei bakah hian Ladakh sector venhim a nih theih nan Chumar-Demchok sector-ah BMP-2 infantry combat vehicle an dah bawk. Indona hmanrua an dah chungchangah hian Fire and Fury Corps (14 Corps) chief of staff Maj. Gen. Arvind Kapoor chuan 14 Corps-te chu hmun chhengchhiah an chet tlat ṭhin thu a sawi a, hetiang hmuna ralthuam dahte hi an enkawl ṭhin thu pawh a sawi bawk.

Ladakh-a India sipai awmte chu khaw vawt tak hnuaiah pawh an chet thiam theihna turin hmalak pui an nih thu Maj. Gen. Arvind chuan a sawi a, thlasik hun atana an thawmhnaw hak tur leh thil dang mamawhte pawh ngaihvensak an nih tawh thu a sawi bawk. 

September thla tir lam khan China sipaite chuan an tank chu Chushul sector hnaih lamah an rawn hung nia sawi a ni a, hei vang hian India sipaite chuan indo thlen palh theihna hmunah tank leh indo ralthuam dang te hi an dah ve ta a ni. 

Kar liam ta khan Corps Commander meeting neih a ni a, he meeting-ah hian India leh China chuan ramri hnaiah sipai leh ralthuam dah belh loh an remti a ni. Thlasik huna intihbuaina awm palh theih thilah India hian tank hi a dah belh a, thlasik lai hian Ladakh sector-a temperature hi -40 degrees Celsius te pawh a ni ṭhin a ni. Khawvawt hnuaia India sipaite an chet thiam nan hian training pawh uluk taka neih pui an ni bawk.