Delhi Chief Minister thar tur Atishi

Arvind Kejriwal-a'n Delhi Chief Minister a nihna aṭanga ban a tum thu a sawi hnuah Aam Aadmi Party (AAP) a thlaktu turin party senior leader leh cabinet minister ni lai, Atishi chu lungrual takin an pawm.

Kejriwal an amah thlaktu atana Atishi a rawt hnuah, AAP MLA te chuan nimin, September 15 khan AAP Legislature Party hruaitu atan Atishi hi lungrual takin an pawm ta a ni.

Atishi chuan AAP Legislature Party hruaitu atana thlan a ni chu lawmawm a tih thu sawiin, Delhi Chief Minister leh a guru, Arvind Kejriwal chungah hetiang mawhphurhna pawimawh tak a pe chu lawmthu a hrilh. Amaha rinna a nghah ngam avang pawhin a hlim hle tih a sawi. Hemi rual hian CM a nihna aṭanga a bang chu pawi a tih thu a sawi a, Delhi Chief Minister chu Arvind Kejriwal chauh a ni tiin a sawi bawk.

Atishi hi Suhsma Swaraj leh Sheila Dikshit hnuah hmeichhe zinga Delhi union territory chief minister ni thei pathumna a ni a. Kar khat chhungin a cabinet minister turte a tifel ang.

Kalkaji bial aṭanga MLA atana thlan tlin, Atishi hi an party-a Political Affairs Committee member niin, Kejriwal kaihhruai Delhi sorkarah hian Education, PWD, Culture and Tourism Minister dinhmun chelh mek a ni a, cabinet minister zinga portfolio chelh hnem ber a ni bawk.

Kum 1981, June 8-a Punjabi chhungkua aṭanga piang, Atishi hi Delhi-a seilianin Springdales School aṭangin high school a zo a, kum 2001-ah St. Stephen's College, Delhi aṭagin history-ah a graduate a ni. Oxford University-ah zir zawmin, 2003-ah master degree a zo a, 2005-ah Magdalen College, Oxford-ah Rhodes scholar in a awm leh a ni.

Kejriwal chuan amah thlaktu tur thlan fel a nih tak avangin, nimin khan Delhi Lieutenant Governor VK Saxena hnenah banna a thehlut ve nghal a ni. Kejriwal hian a ban tur thu a sawi rual khan Delhi assembly inthlan, nakkum February thlaa neih tur chu sawn hmaa, kumin November thlaa Maharashtra inthlan ruala buatsaih a phut thu a lo sawi lang bawk.