Mamata Banerjee-in doctor-te ngenna pawmsak

West Bengal chief minister Mamata Banerjee chuan hun rei tak chhung doctor lungawi lohna lantira nawrh huaihawtte thil phut chu a pawmsak thu a puang.

RG Kar Medical College-a pawikhawihna rapthlak tak thleng kaihhnawihah lungawi lohna lantirtu, doctor-ten an thil phut panga zinga pathum chu a pawmsak tih CM Banerjee chuan a puang a, an ngen angin Kolkata police hotu leh health department official pahnihte ban leh sawn an ni dawn tih a sawi. Hei bakah hian pawikhawihna thlenna hmun, RG Kar Medical College awmna huam, north zone-a police hotu pawh ban a ni dawn bawk.

Sorkarin thuchhuah a siam hnuah, doctor-te pawh hian an hna pawh an thawh chhunzawm tawh beisei a ni.

Banerjee chuan doctor-te thil phut zinga 99% chu a pawmsak tih a sawi a, "Kan thutluknate chu sawi hoin an lo ngaihtuah zui anga, hna zawm leh zawm loh chungchang pawh an rel ang. Mahse damlo te dinhmun te, district ṭhenkhata tuilian tuar mekte dinhmun ka thlirin hna zawm thuai se tiin ka ngen a ni," tiin a sawi. CM hian doctor-te thil phut zinga mi, damdawiin tih hmasawnna leh changtlunna tur atan Rs vbc 100 chu dahhran a ni tih a sawi bawk.

Junior doctor-te sorkarin an thil phut a pawmsak ta chu ni 38 chhung zet nawrh an lo huaihawt tawhna atana hnehna ropui tak a ni tiin, hna thawh zawm chungchang erawh sorkarin a thu tiamte a tihhlawhtlin hunah an thei chauh ang, an ti. 'Tunah chuan ṭawngkam ringawta intiamna kan la hmu a ni," tiin an Junior Doctors' Forum aiawh chuan a sawi.

Chief Minister chuan health official pahnih - Director of Medical Education leh Director of the Health Services chu post pangngaiah sawn a ni dawn tih a sawi a, hei hi an zah lohna vang lam ni loin, zirlaiten an rin ngam tawh loh avang ani tih a sawi a, he post pawh hi an la chelh rei lo a, thil dik lo tih pawh an nei lo niin a sawi. City police hotu, Vineet Goyal chu Durga puja thleng a hna chelhtirin, hemi hnu hian ban a ni dawn tih a sawi. A hma pawhin ban a lo dil fo tawh a, a chelh bet zawk niin a tarlang.