Parliament standing committee 4 ah Congress a chair dawn

Sorkar laipui leh eptu party-ten Parliamentary Standing Committees chungchanga indawrna an neih chu zo felin, Congress chuan Lok Sabha-a committee pathum leh Rajya Sabha-a committee pakhatah chair dinhmun a chang dawn ta.

Lok Sabha-a Congress hian External Affairs Standing Committee, Standing Committee on Agriculture leh Standing Committee on Rural Development bakah, Rajya Sabha-ah Standing Committee for Education chair nihna a chelh dawn a ni.

Congress party hian Parliamentary Standing Committee panga - Lok Sabha-a pali leh Rajya Sabha-a pakhatah chair nihna pek hi a phut. INDIA hnuaia a thawhpui, Samajwadi Party, DMK,leh AITC te pawhin chair dinhmun pakhat ṭheuh an chan rin a ni bawk.

Eptu party te hnenah standing committee chair dinhmun pek chungchangah sorkar aiawh leh eptu member-te hian ṭum eng emaw zat meeting neiin an sawi ho a, sorkar eptute hnena chair dinhmun pek hi a remti thei ta a ni.

August 16 khan Parliament standing committee panga duangin, Congress MP leh general secretary ni bawk KC Venugopal chu Committee on public Account chair atana ruat a ni. Committee dang dinte chu Sanjay Jaiswal (BJP) kaihhruai tur Committee on Welfare of Other Backward Classes, Baijayant Panda (BJP) kaihhruai Committee on Public Undertakings, Faggan Singh Kulaste (BJP) kaihhruai Committee on Welfare of Scheduled Castes and Scheduled Tribes te an ni.

Lok Sabha term liam taah khan Congress hian member 53 neiin, committee pakhatah chauh chair nihna hi a nei. Tun term-ah erawh chuan Congress hian Lok Sabha-ah member 99 neiin, eptu party dang Samajwadi Party-in member 77, TMC-in 29 leh DMK-in 22 an nei ve bawk.