Ram chhiarpui neih a ni thuai dawn : Amit Shah

Union home minister Amit Shah chuan Thawhlehni khan rampumah chhiarpui neih a nih thuai tur thu sawiin, a hun tur hi an puang thuai dawn tih a sawi.

Amit Shah leh I&B minister Ashwini Vaishnaw te chuan prime minister Narendra Modi kaihhruai NDA sorkar term thumnain ni 100 a hman tlinna pualin press conference an nei a, he huna Covid-19 hri len vanga chhiarpui neih hun tur rei tak tihkhawtlai a nih tawh chungchanga zawhna a chhan naah he thu hi a sawilang a ni.

India-ah hian kum 1881 aṭang khan kum 10 danah 'chhiarpui' hi neih ṭhin niin, chhiarpui leh National Population Register (NPR) chu kum 2020 April 1 aṭanga September 30 chhung khan neih tura tih ni mah se Covid-19 hri lengin rampumah harsatna a thlen avangin tihkhawtlai a ngaih phah ta a ni.

Rampuma chhiarpui leh NPR siamṭhatna tur hian a senso atan sorkar chuan Rs vbc 12,000 chuang sen angaih a rin thu official-te chuan an tarlang.

Sorkar agency hrang hrangte chuan chhiarpui hi neih thar a la nih loh vangin, kum 2011 chhiarpui data rinchhan vekin policy leh subsidy te an siam a ni.

Chhiarpui neih tur hi a hmasa ber atan digital hmanga neih tum a ni a, mipuite tan pawh awlsam zawka chhan mai theih turin census form siam a ni dawn a, hemi atan hian portal pawh buatsaih a ni a, mahse tlangzarh a la ni rih lo. Mahni a tihfel theih tur atan hian Aadhaar emaw mobile number erawh neih tel ngei ngei a ngai thung ang.

Office of the Registrar General and Census Commissioner chuan chhiarpui neihna atan hian zawhna 31 a siam a, hengah hian mimal chungchang zawhna te, chhungkuain an thil neih hrang hrang electronics emaw, lirthei emaw an neih leh neih loh te, inchhung bungrua an neih te leh chhungkuaa chengzat te, Schedule Caste/Tribe an nih leh nih loh te, nupa tuak engzat nge chhungkaw khatah awm tihte pawh a tel dawn a ni.