Modi-a'n Quad Summit hmang turin US pan UN Assembly-ah a tel nghal dawn

Prime minister Narendra Modia'n nithum, September 21-24 thleng cham turin nimin khan United States a pan a, Quad Summit a hmang dawn a, UN Assembly-ah a tel nghal bawk ang.

Kumin hi Quad Leaders' Summit vawi li neihna tur niin Wilmington, Delware-ah US president Joe Biden kaihhruainain neih a ni ang. Nakkum 2025-ah Quad Summit-hi India in a thleng ve thung dawn a ni. Quad Meeting hi Australia leh, Japan hruaituten an hmanpui dawn bawk a, kumin meeting hi President Biden bakah, Japan prime minister Fumio Kishida te tel tawpna tur a ni tawh dawn a ni.

Quad hi ram pali - India, Australia, Japan leh United States te an thawhhona tih chakna tur atana pawl din niin, tun hnaiah pawh Quad Foreign Minister te chu vawi riat lai lo inhmukhawm tawhin, Quad chhunga awm sorkar te chuan kawng hrang hrangah inbiakna leh thawhhona chu an nei chhunzawm reng bawk.

Ministry of External Affairs (MEA) chuan, " Quad Summit-ah hian ram hruaitute chuan Quad in kum liam ta chhunga a hlawhtlinna leh hmasawnna neih hrang hrangte thlir hoin, Indo-Pacific huam ram te hmasawnna tur hrang hrang atana an hmachhawp te thlir hona leh sawi hona te an nei nghal dawn a ni," tiin a tarlang.

PM Modi hian New York-a September 23-a United Nation General Assembly neih tur chu a hmang nghal dawn a, Quad summit-a an thu rel 'Summit of the Future' tih chu a sawi dawn a ni. Hei bakah hian summit kar lakah ram dang hruaitute meeting a neihpui nghal bawk ang.

Modi hian September 22-ah New York-a India mi awmte nen hun an hmang ho dawn bawk a, hei bakah US-a company lian CEO te kawmin, ram pahnihte inkara thawh dunna ṭha zawk a awm theih dan turte a sawipui dawn bawk a ni.