Canada-in India hnenah uranium supply leh dawn
Canada rama cham mek, Prime Minister Narendra Modi leh Canada Prime Minister Stephen Harper-te chuan meeting an neih hnuah, Canada-in India hnena uranium a supply na tura inremna an ziah thu an puang.
Narendra Modi hi kum 40 hnua India Prime Minister zinga Canada tlawh leh hmasa ber a ni.
India ram nuclear power plants tana uranium supply-na tur inremna an ziah hian ram pahnihte inlaichinna kawng thar a hawnsak a, Canada Prime Minister Harper chuan Canada-in India mamawh, uranium a neih chu India ram tana supply chhunzawm leh an remti thei ta tih a sawi. PM Modi pawhin inremna an siam thei chu lawmawm a tih thu leh, hei hi ram pahnihte inrintawnna lantirna a ni, a ti.
Hruaitu pahnihte hian an inkawmnaah khawvela firfiaka chetna hluar chho zel chungchang pawh an sawi dun a, firfiaka chetna tihtawp tura nasa zawka beih let a ṭul thu te, khawvelin thawhhona ṭha a neih a ngaih thute an sawidun bawk.
Kum 1970 hmalam khan Canada hian India hnena uranium a supply ṭhin a, mahse Pokhran nuclear test neih a nih hnu khan a supply chhunzawm duh ta lo a ni.
Stephen Harper chuan Modi-a'n an ram a tlawh chuan ram pahnihte inṭhianṭhatna a ti nghet sawt dawn a ni tih a sawi a, an insumdawn tawnna pawhin hma a sawn zel dawn tih a sawi.
Canada PM hian kum 900 zet upa, Khajuraho Temple Sculpture chu PM Modi hnenah hian a pe kir leh bawk. He milim, 'Parrot Lady' tia hriat hi kum 2011 khan Canada rama lut mi pakhat kut aṭangin man a ni a, thuneitute chuan India lam thuneitute biain, pekkir leh dan turte an lo sawiho tawh a ni.